طائـــــر الحــــرية

طبعا بكرة انا اتوقع انه حيبقى يوم غير عادى

وبتمنى فعلا انه بكرة يحصل حاجة تغير شىء ولو صغير فى البلد دى وفينا قبل كل حاجة

الاضراب ده بيتعلن عليه من اكتر من اسبوع فى الانترنت وفى التلفزيون وكذا برنامج من البرامج اللى مفكرة نفسها حرة او بتتكلم بأسم الشعب ولو انى اعتقد انها مش كده وانه لازم يكون ولو حتى نسبة لازم الحكومة بتتدخل فيها

زى القاهرة اليوم والعاشرة مساء و90 دقيقة والخ الخ الخ  

واتعمل اكتر من جروب عشان الاضراب ده  على الياهو والفيس بوك وعشان الرسايل والتفاصيل عنه توصل لكل الناس متبقاش لناس معينة

واكتر ناس انا بشوف انها حتشارك فيه العمال والطلبة والسياسيين دى اكبر فئة لكن طبعا منقدرش ننكر ان فى ناس متعرفش عنه حاجة وفى ناس حتقولك انا لا ليا فى الطور ولا فى الطحين

لكن بعتب طبعا على  على الجروبات اللى مش مقدمة تفاصيل كويسة عن اماكن التجمع

يعنى مثلا المحافظات اللى فيها اماكن تجمع متعرفش منها الا اربعة بس

القاهرة والاسكندرية والمنصورة وبورسعيد 

طب والباقى فين

ده احنا المفروض المناطق اللى نركز عليها كمان مناطق الارياف والصعيد عشان الناس دى تفهم ايه اللى بيحصل ويكون عندها وعى 

معرفش المشكلة فين بالضبط فيه عجز ونقص فى المعلومات ومعرفش مين مسئول عنه بس اكيد اصحاب القيادات اللى دعوا للاضراب هما المسئولين عنه لان قبل كل حاجة لابد انه يتم تنظيم التجمعات فى كل المحافظات وتحديد الاماكن

اولا واخيرا انا لو عليا بشوف ان ياريت الناس تطلع كده بالكوم ويبقى فعلا زى القنبلة واللى انفجرت على الاوضاع دى

دعوة الاضراب ان مفيش حد بكرة يروح شغله ولا المدرسة والكل يقعد فى البيت

واللى حيقدر يروح التجمع ويقول رأيه علانية يروح واللى مش حيقدر ياريت يقعد فى البيت

خللى حركة البلد تتشل خللى البلد متشتغلش خليها توقف عشان الحكومة والعالم دى يعرفوا قيمة الشعب ده

وان زى ماالمواطن ده هو اللى ممشى البلد على رجليها وبيتعب وبيشقى زى ماله حق انه يعيش حياة كريمة ولها قيمة

ودى البوسترات بتاعة الاعتصام

 وفى اخر الكلام بدعى وبقول يارب الاعتصام يحقق حاجة وتبقى نقلة جديدة للوعى السياسى وللبلد

اشوفكم على خير بعد الاعتصام ان شاء الله وتتابع الاحداث